Aмбасадорска тркалезна маса „Западниот Балкан помеѓу Западот и Истокот: Северна Македонија – членка на ЕУ до 2030 година“, во организација на Советот на амбасадори, денеска ќе се одржи во Клубот на пратеници.
Предвиден е засебен панел „Ефективна борба против организираниот криминал и корупцијата: Европски добри практики и домашна реформска агенда“.
На тркалезната маса, како што е најавено, ќе се обратат претседателот Стево Пендаровски, вицепремиерот за европски прашања Бојан Маричиќ, вицепремиерката за политики за добро владеење Славица Грковска, евроамбасадорот Дејвид Гир, амбасадорите на Шведска, Франција, Холандија, Хрватска, Чешка и Романија, заменик-шефот на мисија од Амбасадата на САД, како и поранешните амбасадори Александра Наќева-Ружин, Зоран Јолевски, Ивица Боцевски и Тихомир Илиевски и претседателката на Државната комисија за спречување на корупцијата Билјана Ивановска.
– Целта на настанот е размена на мислења во врска со евроинтегративниот процес на земјата и регионот на Западен Балкан, како и по однос на најдобрите европски практики и домашната реформска агенда на полето на борбата против корупцијата, со што Советот на амбасадори дава свој придонес кон овозможување на поширока општествено-политичка дебата по однос на овие значајни прашања, информира организаторот.
Амбасадорската тркалезна маса е годишен, препознатлив настан на Советот на амбасадори, организиран под покровителство на претседателот Стево Пендаровски.
