Тројца Сиријци, кои биле испратени во Германија од џихадистичката група Исламска држава (ИД) за да извршуваат терористички напади, се уапсени утринава, соопшти германското државно обвинителство.
Тројцата џихадисти, на возраст меѓу 17 и 26 години, се уапсени по обемната полициска рација, спроведена на територијата на Шлезвиг Холштајн и Долна Саксонија.
Во соопштението на Обвинителство се вели дека при рацијата се најдени и заробени големо количество пропаганден материјал, но полицијата засега нема откриено детални планови за целите и локациите на планираните напади.
Тројцата влегле во Германија во ноември 2015 година, за, како што се верува, да ја испитаат ситуацијата во земјата и да чекаат инструкции од водството на ИД.
Сиријците патувале преку териториите на Турција и на Грција, со лажни пасоши.
Германската истрага верува дека станува збор за тројца доброволци за извршување џихадистички напади кои пред да ддојдат во Германија биле обучувани за ракување со оружје и со експлозиви.
Во денешната рација, изведена пред зори, учествувале 200 полицајци и специјалци, кои извршиле претрес во дестина локации, меѓу кои, според весникот „Велт“ и три места каде се наоѓаат бегалци. Сепак, портпаролката на Федералната криминалистичка полиција не ги потврди овие информации.
