Советот за безбедност на ОН денеска треба да гласа за резолуција со која се бара итен и безусловен пристап на претставниците на Обединетите нации во деловите на Алепо кои се под опсада, како и ширум Сирија за да се овозможи испорака на хуманитарна помош.
Советот на безбедност претпладне ќе одржи консултации за резолуцијата која ја подготви Франција, а потоа ќе биде одржан и состанок на кој членките на Советот треба да гласаат.
Според нацрт резолуцијата, генералниот секретар Бан Ки-мун се повикува веднаш да распореди персонал на светската организација на терен за да се спроведе „неутрален надзор“ и „директно набљудување“, за да известуваат за евакуациите.
Во документот исто така се наведува дека евакуацијата на цивили мора да биде „доброволна кон дестинации по нивен избор“.
Рускиот амбасадор во ОН, Виталиј Чуркин во петокот рече дека ќе ја разгледа нацрт резолуцијата, но беше скептичен дека набљудувачите би можеле брзо да бидат распоредени.
