Грчкиот премиер во Европскиот Парламент во Стразбур застана во одбрана на Договорот од Преспа и на неговиот македонски колега Зоран Заев. Ципрас беше особено критичен кон двете опозициски партии во Македонија и Грција, ВМРО-ДПМНЕ и Нова демократија, обвинувајќи дека нивните лидери се служат со идентични аргументи во обид да го отфрлат договорот со кој се става крај на деценискиот спор за името, пренесува Дојче веле.
„Ги молам сите пратеници да го разберат следново – и јас и Заев сме прогласувани за предавници во нашите земји од политичари кои ѝ припаѓаат на Европската народна партија со истите аргументи“, рече Ципрас. „Мицотакис и Мицкоски, кои ѝ припаѓаат на Европската народна партија (ЕПП), нѐ обвинуваат со потполно истите аргументи- дека сме предавници и дека договорот е штетен. Не мислите дека бидејќи двајцата конзервативни лидери нѐ обвинуваат дека сме предавници и дека овој договор е предавство, тоа веројатно значи дека и јас и Заев правиме нешто добро, го отвораме патот кон мирот, перспектива за соработка и мирна иднина, историска иднина и на тоа сум многу горд“, порача Ципрас.
Дебатата во Европскиот парламент на моменти наликуваше како да е пренесена од парламентот во Атина, откако пратеникот на Нова Демократија, Манолис Кефалојанис, го праша Ципрас да каже како во иднина ќе се нарекуваат јазикот и националноста на македонските граѓани.
Ципрас реплицираше со контрапрашање: како досега се нарекуваше оваа земја во Европскиот Парламент?
„Ова е Европскиот Парламент, не можеме да се однесуваме како во грчкиот Парламент и да ја сметаме оваа тема за табу, да ја закопуваме главата во песок. Знаете дека со години ја стававме главата во песок додека реалноста беше поинаква, 140 земји, меѓу нив и најголемите како САД, Кина, Русија, ја признаа оваа земја под нејзиното уставно име, а тоа име е само Македонија. Сите лидери ја нарекуваа Македонија и никој не изгледаше иритирано“, рече Ципрас.
Грчкиот премиер тврдеше дека со договорот Македонија веќе нема да може да претендира на „античкото грчко македонско наследство“, односно дека со него се признава оти соседната земја е словенска и нејзиниот јазик е словенски. „Досега тоа не се случило“, рече Ципрас.
