Денот на Светите браќа Кирил и Методиј, сесловенски просветители и заштитници на Европа, 24 мај, беше одбележан и со академска церемонија посветена на творештвото и универзитетската кариера на македонскиот писател со интернационално реноме Јордан Плевнеш.

Настанот се одржа на парискиот Универзитет Пантеон Асас, инаку, дел на угледната париската Сорбона.

Како што е познато, неодамна, Француската Академија,  токму на предлог на овој универзитет, му ја додели “Гранд При” наградата, за целокупниот книжевен опус на Плевнеш во областа на франкофонијата.

По тој повод претседателот на Униврзитетот Стефан Браконие во својата пригодна беседа ја соопшти одлуката на оваа пресетижна институција, “Портретот на Плевнеш”, дело на големиот македонски академски сликар Родољуб  Анастасов, да биде изложен во “Галеријата на портрети” на Пантеон Асас, како врвно признание од сегашните и идните генерациии професори и студенти.

 

 

На истата церемонија Плевнеш беше промовиран во „Командант на уметностите и книжевностите“, највисоко одликување со кое Француската влада и Министерството за култура на Франција, оваа пролет го овенча неговото уметничко дело, изведувано на голем број светски сцени  и преведено на триесетина јазици по сите меридијани.

Во своето обраќање потпретседателот на Универзитетот, познатиот француски интелектуалец Фабрис Далмеида го поздрави објавувањето на драмата на Плевнеш “Кирил и Методиј кои сте вие” во издание на „Куќата на Европа и Ориентот”, во превод на Фроса Пејоска-Бушро, професор на македонски јазик и книжевност на Институтот за ориентални јазици и цивилизации.

Предговорoт e на театрологот со светско реноме Жорж Бани, автор на книги за Питер Брук, Бертолд Брехт, Тадеуш Кантор и плејада други имиња од светскиот театар, кој оценувајќи го ова дело на Плевнеш за Светите Кирил и Методиј и нивната визија за “Цивилизацијта на љубовта“ го насловува својот текст со реченицата: “Јордан Плевнеш е планетарен писател!”. 

Веле Митаноски