Претседателот на Собранието на Република Северна Македонија Талат Џафери, денеска оствари средба со амбасадорот на Француската Република, Н.Е. Кристијан Тимоние.
Претседателот Џафери изрази благодарност за поддршката од Француската Република во напорите за исполнување на стратешките приоритети на земјава и задоволство од плодната билатерална соработка. Тој информираше за претстојните активности на Собранието на Република Северна Македонија за изборот на комисии, делегации и пратенички групи за соработка, како и усвојување на легислатива во врска со европскиот процес, борбата против Ковид-19 и напорите за отстранување на економските последици од пандемијата.
Амбасадорот Тимоние упати честитки за повторниот избор на Џафери на функцијата претседател на Собранието на Република Северна Македонија и изрази уверување дека улогата и видливоста на Собранието, кое е клучна институција за успешно функционирање на системот, ќе продолжат да се зацврстуваат и во наредниот период. Тој оцени дека парламентарната контрола е од големо значење и изрази поддршка за работата на Националниот совет за евроинтеграции, каде што треба да се постигне консензус за клучните прашања од овој процес.
На средбата беше нагласено дека континуитетот и продлабочувањето на одличната соработка меѓу Собранието на Република Северна Македонија и Национално собрание и Сенатот на Француската Република, во голема мера можат да придонесат за унапредување на севкупните билатерални односи и пријателство меѓу двете земји. Истакнувајќи го значењето на парламентарната дипломатија, соговорниците изразија надеж дека договорените возвратни посети на француски парламентарци во Северна Македонија ќе се реализираат штом ќе се подобрат здравствените услови.
