Партијата на европските социјалисти ја поздрави ратификацијата на Договорот од Преспа во грчкиот Парламент, пренесува МИА.
ПЕС ги поздравува напорите на двете влади и на двата парламента за надминување на повеќе деценискиот спор меѓу двете земји.
-Горди сме што историскиот договор, кој беше постигнат меѓу премиерите Алексис Ципрас и Зоран Заев конечно беше ратификуван од двете страни. Ова е јасен доказ за тоа како земјите можат зад себе да остават спор кој траел со децении. Денешното гласање е позитивен чекор за двете земји, победа за демократијата и јасен знак за тоа што може да стори прогресивната политика, истакна претседателот на ПЕС, Сергеј Станишев.
Со овој Договор, додава тој, се отвора вратата на Република Северна Македонија за влез во НАТО и за почеток на преговори со Европската унија и придонесува за стабилноста на Балканот.
-Иднината на Европскиот проект е посилна поради денешното гласање, рече Станишев.
ПЕС во своето соопштение нагласува дека е горда што е дел од целиот овој процес, овозможувајќи серија средби меѓу Ципрас и Заев за време подготовките на партијата за состанокот на Европскиот совет. Договорот, потсетува партијата, исто така беше поддржан и охрабрен од сите премиери кои членуваат во неа за време на Самитот ЕУ-Западен Балкан во мај, минатата година.
