Мора да се најде компромис за прашањето за името за да се отвори патот на Македонија кон ЕУ и другите организации во кои сака да се приклучи, шефот на грчката дипломатија, Никос Коѕиас, во интервју за весникот „Етнос“.
– Во случајот со ПЈРМ, нашите соседи веруваа дека можат да продолжат со приклучување кон овие организации без договор со нас, нешто што е невозможно, додека некои од нас, пак, веруваа дека инертноста во надворешната политика е наше оружје, наведува Коѕијас.
Тој нагласува дека и Атина и Скопје сфатиле дека треба да работат врз основа на консензус и компромис.
– На сите наши соговорници сега им е јасно дека мора да се најде чесен компромис за прашањето за името со нашиот северен сосед. Вистина е, исто така, дека некои од ЕУ во минатото создаваа илузии дека патот кон членство во Унијата и во други организации може да биде отворен без компромис, наведува Коѕијас, прашан дали е сега моментумот за решавање на спорот за името со Скопје.
Новата рунда преговори меѓу Грција и Македонија треба да почне на 11 и 12 декември во Брисел, со посредство на претставникот на ОН, Метју Нимиц.
