Република Северна Македонија стана првата земја од регионот која ги реши сите познати случаи на бездржавјанство произлезени од распадот на поранешна Југославија. Ова е резултат на повеќедецениски, доследен и одговорен пристап во усогласувањето на националните политики со начелата на меѓународното хуманитарно право и на континуирана заложба за унапредување на правата на секое лице.
Од држава на која во минатото ѝ беше потребна силна поддршка од меѓународната заедница, денес Северна Македонија се позиционира како доверлив партнер кој нуди поддршка, експертиза и позитивни искуства. Националните напори низ годините беа насочени кон намалување и целосно отстранување на состојбата на бездржавјанство во земјата, со конкретни и ефикасни мерки во пракса.
Но, светот и понатаму се соочува со сериозни предизвици – конфликти, присилно раселување и создавање нови случаи на лица без државјанство. Ваквата реалност бара не само зачувување на постигнатото, туку и понатамошна работа, продлабочена соработка и иновативни пристапи во заштитата на најранливите категории, информираат од МНР.
Нашата цел останува јасна: развој и примена на одржливи, инклузивни и праведни политики кои ги почитуваат основните човекови права, вклучително и правото на државјанство. Подготвени сме за понатамошна соработка со УНХЦР во насока на дополнително зајакнување на системот за азил, подобрување на механизмите за локална интеграција на барателите на азил и бегалците, како и воспоставување на ефикасна постапка за утврдување на статус на лица без државјанство.
Оваа визија веќе е вградена во Националната развојна стратегија на Република Северна Македонија, која гарантира дека секој бегалец или раселено лице има загарантирана безбедност и еднаква шанса да го најде своето место во нашето општество.
