Државниот матурски одбор на денешниот онлајн состанок на кој учествуваше и министерката за образование и наука Мила Царовска го прифати предлогот државната матура да се сости од 4 испити (2 екстерни и 2 интерни) и проектна задача. Во наредните денови одборот ќе треба да подготви нова предлог концепција.
На состанокот министерката Царовска и претставниците на одборот меѓу кои и претставници од Бирото за развој на образование и Државниот испитен центар истакнаа дека со ваквата концепција на полагање не се нарушува квалитетот на матурата, се задржува стандардот, и е во интерес на сите матуранти.
Овој модел на полагање на државна матура бил веќе применуван во нашата држава од учебната 2007/2008 до учебната 2012/2013 година. Во извештаите на ОЕЦД, државната матура како дел од образовниот систем е позитивно оценета, соопштуваат од МОН.
