Музејот на современата уметност – Скопје, за првпат е домаќин на Музејот на современа уметност „МОМус“ од Солун.
На 27 септември со почеток во 20 часот, ќе биде отворена голема постановка со наслов „Дали сум јас тоа име или таа слика?“ (Am I That Name or That Image?). Ова е прво претставување на солунскиот Музеј на современа уметност пред македонската публика со дела од нивната колекција.
Во МСУ ќе бидат изложени дела од 16 автори меѓу кои: Fillipo Berta, James Bridle, Fenia Kotsopoulou, Kuriaki Goni, Vladan Jeremic и Rena Radle, Majida Khttari, Marianna Ignataki, Oleg Mavrommati и Boryana Rossa, Virginia Mastrogiannaki, Eleni Mylonas, Natasha Papadopoulou, Marilou Poncin, Vivy Tsioga, Ira Valdron, Evangelia Basdekis, Alexandros Plomaritis…
Паралелно со главната програма на 28 септември предвидена е серија перформанси на уметниците Tomas Diafas, Alexandros Plomaritis и колективот I Broke the Vase – Eva Matsigkou i Nefeli Sani.
„Возбудени сме што со музејот во Солун успеавме да воспоставиме блиски врски и што со заднички сили можеме да продуцираме значајни проекти. Нашата географска близина од Музеј на современа уметност во Скопје до Музеј на современа уметност во Солун е потенцијал што мораме да го искористиме. Живееме во регион кој претрпе и продолжува да страда од последици на национализам и транзиција, бурни социо – политички промени. Соработките нè зближуваат, а изнаоѓањето заеднички решенија и доаѓање до нови и ефективни модели на соработка, се рефлектира и во програмските активности на двата музеи, и во можноста за нови идни институционални билатерални соработки„ истакна директорката на МСУ во Скопје, Мира Гаќина.
Кураторка Сираго Цијара на изложбата „Дали сум јас тоа име или таа слика?“ која наскоро ќе биде отворена во МСУ, вели: „Уметниците, кои се учесници во постановката даваат критички осврт на наивната сигурност на основната дистинкција помеѓу постоењето и неговото измислување, помеѓу реалното претставување и фалсификувањето. „Реалноста“ на меѓучовечкиот однос е нарушена и одново воспоставена, во согласност со имиџот, маската и идеалниот модел што го конструираме за самите себе. Поради тоа и дигиталните медиуми, како фотографијата, интернетот, видеото и проекцијата, се користат во толку голема мера при визуелните претставувања на самиот себе“.
На отворањето на изложбата во Скопје пристигнуваат: кураторката Сираго Цијара, куратори асистентите Домна Гунари, Ерини Папаконстантину, член и претседател на Управен одбор на музејот, Андреас Такис и в.д. директорка на MOMus-Музеј на модерна уметност, Мариа Цацаноглу.
Покрај кураторскиот тим пристигнуваат и уметниците Alexandros Plomaritis, Tomas Diafas, Eva Matsigkou, Nefeli Sani, Rena Radle и Vivy Tsioga.
