Министерството за внатрешни работи денеска соопшти дека постапува по пријава за незаконско издавање лекарски уверенија на граѓани со цел тие наместо во недела, на 11 декември, да гласаат во сабота, на 10 декември, како болни и немоќни лица, во домашни услови. Во постапката, посочуваат од МВР, било утврдено дека некои од лицата се во добра здравствена состојба и оти одат на работа.
ОД МВР потенцираат дека до нив била доставена пријава на 2-ри овој месец, во која било наведено дека постои сомнение оти доктор М.И., вработена во ЈЗУ „Геронтолошки завод 13 Ноември”, издала повеќе специјалистички извештаи за пациенти со невистинита содржина за нивната здравствена состојба (неподвижен) од што, како што велат од Министерството, произлегува сомнение за сторено кривично дело „Издавање и употреба на невистинито лекарско или ветеринарно уверение”.
– Од извршениот увид во доставената документација во прилог на пријавата е констатирано дека М.И. на ден 25 ноември 2016 година во временскиот период од 12:34 до 15:43 часот издала 15 специјалистички упати и 15 специјалистички-субспецијалистички извештаи, а на ден 28 ноември 2016 година во временскиот период од 11:11 до 11:38 издала 14 специјалистички упати и 14 специјалистички-субспецијалистички извештаи, се вели во соопштението од МВР.
Во прилог на известувањето била доставена и медицинска документација, односно извештај на специјалистот-субспецијалистот од ЈЗУ” Геронтолошки завод 13 Ноември-Скопје”, заверен со факсимил и потпишан од М. И.
– МВР изврши службени разговори со директорот на ЈЗУ “Геронтолошки завод 13 Ноември”, со докторката М.И., како и со членовите на комисијата која ги посетувала подносителите на барањата во нивните домови и констатирала дека се „болни и неподвижни“, Ј.Ј, Л.Ј. и П.М., сите вработени во оваа институција како медицински лица. По преземањето на повеќе оперативно-истражни мерки констатирано е дека дел од лицата на кои од ЈЗУ “Геронтолошки завод 13 Ноември – Скопје” им се издадени специјалистички извештаи со дијагноза „не се движи, односно тешко се движи” и од нивна страна се употребени во Државната изборна комисија, всушност се во добра здравствена состојба, а некои од нив редовно одат на работа, се вели во соопштението.
Во текот на денешниот ден едно од овие лица, вработено во гимназијата „Никола Карев“ во Скопје, велат од МВР, е затекнато на работното место од страна на полициските службеници и е повикано на службен разговор во полициска станица. Во тек е проверка на останатите лица за кои се издадени вакви специјалистички извештаи. По завршување на истрагата ќе бидат поднесени соодветни поднесоци против сите инволвирани лица.
