Француската полиција денеска го приведе на распит поранешниот претседател на Франција, Никола Саркози во рамки на истрагата за илегално финансирање на неговата предизборна кампања.
Според извори од Министерството за правда на Франција, полицијата го испрашува поранешниот претседател на државата во врска со наводни неправилности во финансирањето на неговата изборна кампања. Никола Саркози од таа причина е задржан во полициски притвор, изјави денеска претставник на правосудството. Агенцијата АФП јавува дека истрагата ја води службата за борба против корупција. Извештај на весникот „Ле Монд“ тврди дека станува збор за истрага поврзана со изборната кампања во 2007. година, кога таборот на Саркози примил пари од извори од Либија. Адвокатот на Саркози засега не е достапен за коментар, а нема информации ниту од обвинителството.
