Иако Македонија се соочува со демографска криза, власта го одби Предлогот на Левица за породилно отсуство од 18 месеци
Излагање на пратеникот Амар Мециновиќ, по однос на предлог измените во ЗРО, преку кои пратениците од #Левица предложија зголемување на породилното отсуство од 9 на 18 месеци:
-„Овој предлог-закон одговара на вредносните компоненти на двата кампуса политички, левиот и десниот. Од една страна ја имаме вредноста за социјалните права и улогата на државата во продлабочувањето на социјалните права. Од друга страна ја имаме конзервативната концепција за ‘семејни вредности’, а сите нас нѐ обединува една голема национална потреба за донесување на ваков закон.
Во 2016 имало иницијатива за ваков закон, па во 2017 пратеничката група на ДПМНЕ предложила вакви законски измени, кои тогаш не добиле поддршка од тогашното мнозинство. Затоа сметаме дека денес ние ќе добиеме поддршка од владејачкото мнозинство.
Со измените во ЗРО предвидуваме продолжување на породилното мајчинско отсуство, од сегашните 9 месеци, на 18 месеци. Без разлика дали станува збор за едно или повеќе новороденчиња или пак за посвојување на дете до полнење возраст од 18 месеци на детето“.
Пратеникот Мециновиќ истакна дека овој предлог во однос на мајчинството е само почеток, а треба да се адресираат и други неразумни сегменти какви што се: условот за непрекинат работен однос од 6 месеци, губењето на работното место и со тоа – ограничување на породилното отсуство и слично.
Тој ги наброи здравствените и психолошките придобивки за мајката и детето, финансиската стабилност на родителите, како и општествените придобивки.
Мециновиќ ја истакна и демографската криза во Македонија, односно негативниот прираст по којшто апелираше дека мора итно да се делува.
За крај тој посочи дека и компаративната анализа од европските земји укажува на потребата од вакво законско решение и потести дека Македонија во својата политичка традиција ги негува ваквите социјални политики, а во изминатите три децении за жал Македонија се откажува од истите кои, впрочем, биле карактеристични за неа.
