Обвинителството поднесе обвинение против 30 лица за настаните кои се случија во Собранието на 27. април, кога беше извршен упад во Собранието и беа нападнати пратенции, новинари и собраниски службеници.
Од вкупно 35 осомничени обвинението е поднесено против 30 лица, за четири лица е прекината постапката бидејќи не се достапни за органите на прогонот, а за едно лице постапката е запрена бидејќи обвинителството не нашло докази дека лицето сторило кривично дело.
Дваесет и осум лица се товарат за терористичко загрозување на Уставниот поредок и безбедноста, а две лица се товарат за помагање за истото кривично дело.
Јавниот обвинител, Љубомир Јовевски рече дека обвинетите го загрозиле уставниот поредок со насилство и создале чувство на несигурност и страв.
-Опсежната истрага утврди дека обвинетите дејствувале со иста цел извршувајќи усогласени дејствија – рече Јовевски.
