Владината делегација, предводена од премиерот Зоран Заев заедно со заменик-претседателот на Владата задолжен за европски прашања, Никола Димитров и министерот за надворешни работи, Бујар Османи пристигна во работна посета на Тирана, на покана на германската канцеларка Ангела Меркел.
Канцеларката Меркел во рамки на својата посета на Западен Балкан организира работен ручек со лидерите на земјите од регионот, на кој главна тема ќе биде регионалната соработка.
Во попладневните часови премиерот Зоран Заев ќе има и одвоена билатерална средба со канцеларката Меркел на која ќе се разговара за трговската размена помеѓу двете земји, политичките околности за понатамошното проширување на ЕУ и иницијативата Отворен Балкан чија главна цел е забрзана интеграција на регионот во Европската Унија.
“Во пријателска атмосфера попладнево во Тирана имаме работен ручек со германската канцеларка Ангела Меркел, заедно со лидерите од Западен Балкан, на кој главна тема е регионалната соработка”, изјави премиерот Заев од Тирана.
