„Солзотворец“ е роман кој зборува за љубовта низ призмата на темна романса, жанр кој е особено популарен на „Букток“ – книжевното ќоше на „ТикТок“.
Италијанската сензација, еден од најпопуларните европски романи за млади објавен оваа деценија „Солзотворец“, е новото издание на Издавачки центар ТРИ. Оваа фантастична и мрачна романса е дел од едицијата „Нашите приказни“, а на македонски ја преведе професорката Радица Никодиновска.
Адаптиран и во филм во продукција на „Нетфликс“, романот на младата италијанска авторка Ерин Дум се задржа на првото место на листата на најпродавани книги пет недели по ред и во Италија е продаден во над половина милион примероци за три години.
„Оваа темна љубовна сага ги запознава читателите со книжевните ликови Ригел и Ника, кои се мачат да ги откријат во себе љубовта и добрината што ги немале во домот за незгрижени деца. За да можат да бидат заедно, мора да се помират со деструктивната љубов пред таа целосно да ги уништи. И двајцата со скршени срца, стануваат делчиња од една сложувалка во совршен спој“, се вели во описот за романот, кој од критиката беше оценет како „новиот“ „Самрак“ од Стефани Мајер.
„Солзотворец“ е роман кој зборува за љубовта низ призмата на темна романса, жанр кој е особено популарен на „Букток“ – книжевното ќоше на „ТикТок“.
Ерин Дум е млада италијанска писателка која прво пишува под псевдонимот „Матилде“, а во 2017 г., на блог-апликацијата „Ватпад“, објавува два романа – „Начинот на кој паѓа снегот“ и „Солзотворец“. Поттикната од огромниот интерес на читателите за „Солзотворец“, издавачката куќа „Магаѕини Салани“ го издава неговото преработено издание во мај 2021 година, кое станува вистински бестселер и досега е преведен на 26 јазици.
Овој роман е дел од едицијата „Нашите приказни“, поддржана од Европската Унија. Со книгите од овој проект ТРИ имаат за цел да ги доближат до македонските читатели европските популарни автори и книги кои веќе имаат свое место во светската литература и кои поттикнуваат позитивни промени во светот.
