Средношколците од 22 средни училишта покажаа голем интерес и се запознаа со студиските програми на факултетите и универзитетите во рамките на проектот „Училиштата на Град Скопје со отворени врати за факултетите и универзитетите за промоција на нивните студиски програми“, кој се реализираше во периодот од 15 март до 1 април годинава.
Универзитетите и факултетите имаа можност во точно определен ден, да ги презентираат своите програми и непосредно да дадат одговори на прашањата што си ги поставуваат идните академски граѓани. Нивните студиски програми просечно беа претставени пред околу 150 ученици во завршните години од средното образование, во секое училиште.
За реализација на проектот беше ангажиран стручен тим од Секторот за образование на Град Скопје, средните училишта на Град Скопје со нивните стручни служби, класните раководители, дежурните вработени и останатите административни работници коишто дадоа сериозна поддршка за спроведување на отворените денови.
Успешноста на отворените денови и големиот број заинтересирани ученици отвораат можност ваквите активности да станат редовна пракса во средните училишта на Град Скопје.
