Во недела ќе се одржи најголемиот спортски настан, Виз Ер Скопски маратон. Стартот на трката ќе биде во 8:30 часот, од платото пред Спортски центар Борис Трајковски, каде што истовремено ќе биде и целта на маратонот.
Од организацијата на маратонот известуваат дека низ скопските улици во периодот од 7:30 до 14:00 часот ќе има привремен режим на сообраќај и промена на режимот на работа на линиите на Јавниот градски превоз. Некои улици ќе бидат целосно затворени за сообраќај, а некои делумно.
Целосно затворени за сообраќај ќе бидат следниве улици:
Ул. Димитрије Чуповски, булевар Илинденска од Влада на РМ до Зоолошка градина, Ул.Војвода Васил Чакаларов, ул. Митрополит Теодосиј Гологанов, ул. 11 Октомври, делот на бул. Крушевска Република од семафорите кај Тутунски Комбинат до семафорите кај Полициската Станица Пролет, бул. 3 Македонска Бригада од семафорите кај Полициската Станица Пролет до раскрсницата со ул. Фрањо Клуз, десната коловозна лента од бул. Јане Сандански од Тобако во правец накај Аеродром се до раскрсницата со бул. Србија.
Делумно затворени за сообраќај ќе бидат следниве улици и правци:
– десната коловозна лента од бул. Климент Охридски до семафорите кај Влада,
– бул Илинденска, од Зоолошка градина до Љубљанска, спротивната страна ќе биде слободна за движење
– ул. Љубљанска во правец од бул. Илинденска до семафорите кај бул. Партизански одреди, ул. Московска во правец од бул. Партизански Одреди до Студентскиот дом Гоце Делчев.
Натпреварувачите ќе почнат да трчаат од стартот С.Ц Борис Трајковски до Ул.Илинденска па лево на ул. Љубљанска, и право на Московска, па десно по Ул.Војвода Васил Чакаларов, на крајот од улицата се врти полукружно назад, кога ќе се вратат кај Студентскиот Дом “Гоце Делчев“ се продолжува право по М.Теодосиј Гологанов, Димитрие Чуповски, 11 Октомври, Крушевска Република, 3 Македонска Бригада, Фрањо Клуз, Бул.Јане Сандански до крајот (раскрсница со бул Србија), пред семафорот со бул.Србија се врти полукружно назад (на истата коловозна лента) по Бул.Јане Сандански, Фрањо Клуз, Трета Македонска бригада, Крушевска Република, 11 Октомври по Димитрие Чуповски до раскрсницата десно на Бул. Климент Охридски до Бул. Илинденска, лево кај Влада на Р. Македонија до целта, платото пред СЦ Борис Трајковски. Истата патека се трча 2 круга за маратонците.
Оваа година Виз Ер Скопски маратон се одржува во 16-ти пат. Организатор на трката е Сојузот на спортови на Скопје, во соработка со Министерството за внатрешни работи, Атлетската федерација на Македонија, АК Работнички и други помагатели, а под покровителство на Град Скопје, Канцеларијата на Европската Унија во Скопје и Агенцијата за Млади и Спорт.
