Премиерот Зоран Заев денеска ги повика граѓаните на Македонија да излезат на референдумот и да гласаат според своето убедување, а тој самиот се обврзува дека ќе го поддржи нивниот избор. Сега е време на храбри чекор за татковината, сега е време за патриотски одлуки, порача Заев.
“Собранието го утврди датумот на референдумот. Секој е должен да ја преземе одговорноста за својата иднина и за иднината на својата земјаСекој од нас е должен да ја преземе одговорноста за нашата иднина и за нашата земја. Вашиот глас е ваше право, не дозволувајте некој да го одземе. Јас се обврзувам дека ќе го почитувам исходот од вашиот избор, без разлика на резултатот, на таа волја.”
Ова денеска го истакна премиерот Зоран Заев во обраќањето пред граѓаните, на кое присуствуваа сите министри во Владата.
Тој ги повика граѓаните слично како на референдумот во 1991 година да донесат историска одлука, односно да излезат и да гласаат за иднина во ЕУ и НАТО и да не дозволат некој да ја држи Македонија во заложништво. Заев се обрати и на членовите на ВМРО-ДПМНЕ, повикувајќи ги да преземат одговорност.
“Раководството на опозицијата сака да ја попречи и да ја одложи нашата иднина. Тие велат дека би можеле да добијат подобар договор. Имаа 10 години да направат договор, но поважно им беше да не држат искарани со соседите, додека си играа со стиропор и споменици отколку да изградат иднина. Со години бараа референдум и сега кога Собранието носи одлуки дека треба да се чуе гласот и волјата на грѓааните, истите тие срамно го напуштија парламентот и бегаа од одговорност “– рече Заев и додаде дека им се обраќа и на членовите на ВМРО-ДПМНЕ на кои им рече дека вратата им е отворена.
“Лично јас презедов ризик за себе, направив чекор зашто е важно за Македонија и за иднината. Имате и вие обврска како и сите граѓани да направите чекори и да ја обезбедите индината на нашата заедничка Македонија “– рече Заев.
На новинарско прашање што доколку не се исполни условот за доволна излезност и дали во тој случај резултатот од народното изјаснување ќе биде релевантен, Заев рече дека е убеден дека граѓаните ќе изберат правилно и ќе излезат, а ако не го сторат тоа, ќе го дадат правото за одлучување на инстиутциите.
– “Ако граѓаните заклучат дека прашањето им е тешко и дека не се доволно информирани, може да одлучат и да останат дома, без разлика на политичките партии. Во таков случај тие ја пренесуваат одлуката на институциите. Не сакам да помислам што ако не биде исполнет цензусот. Апелирам граѓаните сериозно да го сфатат процесот. Не размислувам за неуспешен референдум, за неисполнет цензус. Уверен сум дека повеќе од 50 отсто од граѓаните ќе излезат и голем број ќе гласаат за евроатланска иднина на земјата” – рече Заев.
