Претседателот на Владата на Република Северна Македонија, Зоран Заев, денеска на прес-конференција се обрати по повод заклучоците на Европскиот Совет.
Пред два дена во Брисел ни беше направена голема неправда. Европската Унија не го испорача тоа што ни го вети. Ние ги завршивме сите наши обврски. Испорачавме резултати во реформите, ги решивме споровите со соседите. А тие не си останаа на зборот и не испорачаа.
Тоа што Европската Унија не успеа да донесе одлука за отворање преговори со нас е нивна ИСТОРИСКА ГРЕШКА, и тоа го потврдија сите европски лидери. Ние направивме се што требаше и се што можевме.
Денес, сакам јавно да се заблагодарам на огромното мнозинство европски лидери кои се бореа за да се донесе позитивна одлука за нас. Ја цениме нивната поддршка и знаеме дека и во иднина може да сметаме на нив.
Но, факт е дека ние сме жртви на историска грешка на ЕУ и тоа кај сите нас предизвикува огромна огорченост. И јас сум разочаран и лут, и знам дека целиот наш народ така се чувствува. Затоа, гневот и тежината на граѓаните ги чувствувам како уште една лузна.
За мене лично, ова неисполнето ветување е исклучително лоша и неправедна постапка на Унијата, а истовремено и сериозна работа. Јас така ја толкувам и никако поинаку.
Но, тоа е одлука на ЕУ, заради нивни нерешени внатрешни работи и таа одлука ние не можеме да ја промениме.
Сепак, ние и тоа како сме одговорни за сопствените одлуки, кои ги носиме за нашите граѓани и за македонската иднина.
Сериозноста на актуелниот миг бара од мене и од сите нас сериозна одлука.
Поаѓајќи од моите уверувања дека секој политичар мора да биде одговорен, чесен и доблесен, ја преземам врз себе разочараноста на својот народ и ОДГОВОРНО излегувам пред граѓаните!
Се исправам пред вас, и јасно и одлучно порачувам:
Европскиот сон на македонскиот народ, и на Албанците, Србите, Власите, Турците, Ромите, Бошњаците и сите други кои живеат во нашата земја – нема да биде срушен.
Затоа почитувани граѓани, ОДГОВОРНО се исправам пред вашата одлука. Сега е потребен вашиот став. Немаме време за губење.
И затоа мојот предлог е:
Организирање брзи предвремени избори. Избори најбрзо што може.
Избори на кои вие граѓаните ќе донесете одлука и потврда за патот по кој треба да продолжи нашата земја. И токму ова ќе биде мојот предлог на утрешната лидерска средба кај претседателот Пендаровски. Организирање избори најбрзо што може, за граѓаните да кажат по кој пат да одиме натаму.
Граѓаните имаат мандат да одлучат:
Дали да одиме по вистинскиот пат на демократски и европски вредности, патот на развој и просперитет, патот што води НАПРЕД?
ИЛИ
Да одиме по мрачниот пат на изолација, национализам, поделби и конфликти, односно патот што води НАЗАД?
Граѓаните ќе одлучат:
Дали ќе градиме партнерство со соседите и со останатите земји од слободниот демократски свет, или ќе продолжиме со конфронтации и проблеми и со соедите и со сите наши пријатели?
Само граѓаните и никој друг имаат право да одлучат:
Дали ќе изберат повисоки плати, изградба на патишта и градинки, огромна социјална помош, поддршка за домашните фирми, мерки против загадувањето и враќање пари директно кај граѓаните?
ИЛИ
Ќе се вратиме назад во заробената држава, во времето на споменици, фасади од стиропор, Субрата Рој криминални инвестиции, етнички тензии, затворање медиуми, тепање студенти и богатење на неколкумина на грбот на сиромашните?
Јас сум подготвен. Мојата партија е подготвена. Мојот тим е подготвен.
Ние не паѓаме со духот и не се откажуваме поради одредено разочарување. Ние не се предаваме. Ќе се бориме храбро и пркосно.
Јас немам право да престанам да се борам, се борам рамо до рамо со вас зашто и вие се борите
Подготвен сум за нов, целосен, јасен и чист мандат доверен од граѓаните:
ЗА ДА ЈА ДОНЕСЕМЕ ЕВРОПА ТУКА.
ЗА ДА ГИ ЗАЈАКНЕМЕ РЕФОРМИТЕ.
ЗА ДА ЈА ДОРАЗВИЕМЕ ЕКОНОМИЈАТА.
ЗА ДА ГРАДИМЕ ЕВРОПСКА ДРЖАВА, без разлика дали Унијата е подготвена да отвори поглавја или не.
Почитувани граѓани, народе мој,
Сакам да истакнам дека сѐ што работевме во изминатите две и пол години, го работевме со љубов за доброто на татковината и за сите наши граѓани. Изгледаше невозможно, но се фативме за работа, носевме храбри одлуки да ги решиме најголемите проблеми. Тоа го направивме за нашите сограѓани, и за децата на нашата земја.
Затоа, нема да дозволам било кој да ни ги поништи реформите кои ги направивме, да ни ја земе слободата која заедно ја донесовме во земјата и да си поигра со европските промени кои ги доживеа нашето општество. Нема да дозволам никој да ни го одземе членството во НАТО и да ни ја наруши безбедноста и стабилноста која ја добиваме станувајќи членка на НАТО.
За доброто на татковината и на граѓаните стојам исправено и одговорно пред вас.
Пред вас сакам да порачам дека сум горд и да ве повикам сите вас да биде горди на сите успеси до кои стигнавме заеднички. Остваруваме голем сон – стануваме членка на НАТО.
Ќе оствариме уште еден – ќе си ја направиме земјата ЕВРОПСКА. Македонскиот сон е ЕВРОПА и тие вредности ги градиме во својата земја – можеме да ја донесеме ЕВРОПА во Северна Македонија, а Унијата, кога ќе биде спремна нека ги отвори поглавјата.
И ве повикувам да продолжиме уште посилно. Сите заедно. Двојно повеќе да работиме, двојно повеќе да направиме. Да сме двојно подобри. Промените и реформите не ги носеше и не ги носи една влада, или 20 луѓе. Потребни сме сите за уште повеќе да реформираме. Сите 2 милиони. За да нема загадување, да престанеме да загадуваме. За да нема корупција, да се спротивставиме на митото и поткупот. За да не си одат младите, да отвораме работни места, да обезбедиме повисоки плати. За да не биде, мора да не бива.
На оние кои здушно работеа и посакуваа да не ни биде даден старт за преговори, и кои тајно или јавно се радуваат на неуспехот на својата земја, сакам да им кажам да не забораваат дека овој народ ќе го памети тоа, особено кога ќе застане на гласачкото место. A тоа е многу скоро.
