Претседателот Стево Пендаровски во интервју за грчкиот весник Етнос укажува дека Русија продуцира исклучително сериозни хибридни закани кон целиот Балкански регион, особено политичка пропаганда и кампања на дезинформации.
„Во Северна Македонија, нивната комплексност и интензитет се исти како оние во 2018 година, за време на референдумот по Договорот од Преспа. Немам целосни сознанија за останатите земји, но неколкуте кревки точки во регионот и се добро познати на Москва и таа секако се обидува да пенетрира“, вели Пендаровски.
Во однос на францускиот предлог, претседателот Пендаровски повтори дека за него тоа е своевиден преоден компромис со попатна вметната блокада.
Во контекст на Договорот од Преспа, Пендаровски во интервјуто зборува за придонесот од него, нагласувајќи дека неговиот директен ефект е зачленувањето на Северна Македонија во НАТО.
„Неговата позитивна страна се оглед и во тоа што голем дел од граѓаните сфатија промената на името воопшто не го засегна нашиот национален идентитет а тоа предизвикуваше најголема загриженост во текот на долгогодишните преговори. Противници и натаму има, но, не во обем како што тоа беше во периодот на уставните измени. Претпоставувам дека слично е и кај Вас. Очекувам, како што одминува времето, многу повеќе луѓе да сфатат дека договорот во суштина означи стратешко отворање за двете земји. Тој отвора и нови можности за економска и трговска размена, за странски директни инвестиции. Интерконекторот за гас кај Александрополис е последниот пример за тоа. Заедничко вложување кое ќе биде од взаемна корист и на двете држави“, оцени претседателот.
Во однос на неговото спроведување, Пендаровски нагласи дека динамиката зависи од внатрешно политичките случувања во Грција. Тој изрази надеж трите меморандума усогласени и потпишани уште во 2019 година (Меморандум за забрзување на процесот на интеграција на Северна Македонија во ЕУ; Меморандум за формирање Координативен комитет за економска соработка и Техничка спогодба за надгледување на FIR Скопје н.з) ќе бидат ратификувани а тоа ќе го отвори патот за нови билатерални договори меѓу двете земји.
„Сите овие документи се значајни за зајакнување на правната основа на нашата соработка, настрана од политичката, која е многу подобрена во изминатите неколку години“, вели Пендаровски за Етнос.
Прашан дали се надева на втор мандат, претседателот Пендаровски подвлекува дека фокусот на неговиот ангажман е најдобро што може да управува со земјата низ немирните води на домашната и меѓународната политика.
„Навистина ми е важно само едно – ставовите и поддршката на моите сограѓани. Во текот на мојата кариера, никогаш не размислував за какви било идни потези без поддршка од мојот народ“, истакнува Пендаровски во интервјуто за грчкиот весник Етнос.
