Кино Милениум, 05.октомври
Дванаесетото издание на Фестивалот на новиот германски филм официјално започнува вечерва во киното „Милениум“, каде ќе има проекција на филмот „Мед во главата“.
Фестивалот се одржува под мотото „Сакам филм“, а ќе бидат прикажани десет актуелни германски продукции во десет македонски града. Организатори се Амбасадата на Сојузна Република Германија и ПроКредит Банка.
Кино Фросина, 06-09. октомври
Освен „Мед во главата“ на Тил Швајгер, кој со срдечност ја тематизира Алцхајмеровата болест и кој со преку 7 милиони гледачи беше најуспешниот филм во 2015 во Германија, во киното „Фросина“ од 6 до 9 октомври ќе бидат прикажани и различни комедии, драми, трилер и семејни филмови.
Публиката ќе може да ја погледне трилер-драмата поврзана со Берлин, „Викторија“, снимана во една единствена сцена. Меѓу другите, ќе биде прикажан политичкиот трилер „Лагите на победниците“ кој ја претставува моќта и беспомошноста на печатот, потоа филмот „Во лавиринтот на молчењето“ – опис на почетната приказна на процесите во Аушвиц од 1965 година, но и „Државата против Фриц Бауер“, кој беше награден за најдобар игран филм во 2015 година.
„Филмовите нудат можност, Германија своите култура, историја и општество да ги претстави на широка публика. Тие се случуваат во Германија, но пораките се универзални и разбирливи за сите гледачи. Се тематизираат разнообразни области на човековиот соживот, љубовта и проблемите во врските, семејството и пријателството, училиштето и пубертетот, староста, болеста и смртта“, соопштуваат организаторите на фестивалот.
Почеток на турнејата низ земјава почнува на 10 октомври во Куманово, а потоа следат и
Прилеп, Битола, Охрид, Велес, Кавадарци, Тетово, Струмица и Штип.
