Министерката за труд и социјална политика Јагода Шахпаска денеска учествуваше на трибина на петтата „Текстилијада“, во Штип, во организација на граѓанското здружение Гласен текстилец. Во својата дискусија на тема „Институциите во интерес на работниците“ рече дека Владата и Министерството за труд и социјална политика навремено реагираат и помагаат во брзо решавање на проблемите на работниците особено на 42.000 вработени, претежно жени во текстилната индустрија.
Согласно владиниот Оперативен план за активни програми и мерки, предвидена е поддршка на невработените лица кои ги изгубија работните места во периодот на кризата предизвикана од корона вирусот, особено на вработените во текстилната индустрија. Министерката порача дека до крајот на годината согласно економските текови ќе растат и минималната и просечната плата.
Таа потенцираше дека Владата согласно Програмата за работа, ја изедначи минималната плата на вработените од текстилната индустрија со минималната плата на сите вработени. Минималната плата до сега е зголемена за 64%, односно од 8.980 денари денес е 15.194 денари.
Според министерката Шахпаска, за да се одговори на реалните потреби на работниците МТСП подготвува нов Закон за работни односи.
„После 16 години Законот за работни односи ќе кореспондира со технолошкиот развој, со потребите на работниците и на работодавачите. Прецизно ќе ги уредиме договорите на определено време со што ќе обезбедиме сигурност за работниците, ќе уредиме после колку време и под кои услови тие треба да преминат во договори на неопределено време, ќе ја регулираме сезонската работа, особено правата на работниците во периодот кога не се сезонски ангажирани. Ќе обезбедиме модерно и ефикасно решение за породилното отсуство, во делот на мајчинството и родителството, во кое и таткото ќе има право за отсуство од работа. Породилното отсуство ќе биде подолго од сега предвидените девет месеци“, рече Шахпаска.
Во насока на зголемување на работничките права е и новото законско решение кое предвидува пензионирање со 64 години возраст и 15 години стаж за жени и мажи но и Законот за недела неработен ден, со кој ќе се овозможи 92 проценти од работниците во државата, недела да им биде ден за неделен одмор.
Владата донесе и повеќе пакети на економски мерки кои беа во насока на заштита од ширење и превенција код Корона кризата. Беа ослободени и се уште се ослободени од работни обврски бремените жени, а работодавачите беа поддржани со неколкуте пакети на мерки за редовна исплата на платите.
МТСП подготвува и Закон за социјални претпријатија, а до крајот на месецов ќе биде отворен и Центарот за поддршка на социјалните претпријатија. Министерството за труд и социјална политика подготви и Стратегија за безбедност и здравје при работа со која се добиваат јасни насоки, за дејствување за период од 2021 до 2025 година. Подготвен е и Акциски план за период од 2021 до 2023, со кој се утврдени конкретни активности и мерки што ќе се реализираат за остварување на планираните стратешки цели.
