Претседателот на Собранието, Талат Џафери до граѓаните на Република Северна Македонија упати честитки по повод државниот празник, 11 Октомври – Денот на народното востание.
“Оваа година е посебно значајна, затоа што одбележуваме јубилејни 80 години од денот кога борците на антифашистичката генерација се исправија решително и несебично во борба за слобода и достоинство, положувајќи го најскапоценото во глобалната битка на доброто против злото. Тие ја избраа потешката, но исправна страна и со тоа ги сочуваа своето достоинство, човечноста и солидарноста но над сѐ, го дадоа својот придонес за подобар, похуман и поцивилизиран свет, свет без болка, солзи, без поделби и тага. Таа желба за слобода, придонесе и во градењето на државноста и затоа, денес оддаваме почит на сите кои имаа удел во таа борба, за да можеме сите ние да ги уживаме благодатите на животот во слободна, силна и демократска држава, која од минатата година со членството во НАТО, и самата е контрибутор во светскиот мир и поредок. Битно е, лекциите од минатото да се научат, да се запомнат и никогаш повеќе да не се повторат затоа што, поделбите никому не носат ништо добро и во овој свет само сплотеноста носи кон прогрес.
Драги граѓани, Ви посакувам да имате убав празничен ден!
Честит 11 Октомври – Денот на народното востание!” – честиташе Талат Џафери.
