Градоначалникот Петре Шилегов додели специјални признанија и парични награди на матурантите – првенци на генерацијата од 23 скопски средни училишта, на традиционалната манифестација „Средба на првиот со најдобрите“ која се одржа на Школката во Градскиот парк.
Оваа манифестација има цел да го афирмира училишниот успех на првенците на генерација во средните училишта на Градот Скопје и да им оддаде јавно признание за постигнатите резултати. И оваа година е награден успехот на учениците од средните стручни училишта кои се опфатени со тригодишното образование, а признание е доделено и на ученици со попречености кои постигнале особени резултати во процесот на инклузија во образованието.
-Почестен сум што сум овде со вас, што вие не примате нас повозрасните во вашето друштво. Нема поголемо задоволство за градоначалник на еден град од тоа кога ја гледа иднината на својот град вака собрана на едно место. Годинава доделуваме 34 награди за првенците на генерацијата од 23-те скопски средни училишта. За жал, едната награда ја доделуваме постхумно, за таа трагедија сме сите известени, но тоа дете ја заслужи оваа награда која Градот со задоволство ќе ја врачи на претставниците на неговото семејство. Многумина од вас ќе станат инженери, доктори, адвокати, судии, обвинители, не знам кој од вас што ќе работи во животот, но ви порачувам што и да станете, да останете луѓе пред се. Тоа е најбитниот момент во животот на луѓето. Ние возрасните кои водиме различни институции сме овде да ги срушиме границите, вие бидете тие кои ќе ги срушите бариерите – им порача на матурантите првенци градоначалникот Шилегов.
Тој им честита на учениците на сите досегашни успеси и им посака да ги остварат сите сништа.
Оваа година првенци на генерацијата се: Викторија Коцевска од СУГС „Димитар Влахов”, Александар Анакиевски од СУГС „Димитар Влахов”, Јана Мајнова од СУГС „Јосип Броз Тито”, Петар Стаменковски од СУГС „Марија Кири Склодовска”, Тео Ѓекиќ од СУГС „Марија Кири Склодовска”, Ана Марија Тенџеревска од СУГС „Браќа Миладиновци”, Марија Савеска од СУГС „Браќа Миладиновци”, Ерика Асанова од СУГС „Владо Тасевски”, Златко Марковиќ од СУГС „Владо Тасевски”, Гоце Таковски од СУГС „8 Септември”, Елена Стаменковска од СУГС „Здравко Цветковски”, Давид Субашевски од СУГС „Панче Арсовски”, Агон Ајдини од СУГС „Зеф Љуш Марку”, Никола Петровски од СУГС „Орце Николов”, Сотир Собралиев од СУГС „Михајло Пупин”, Лука Насевски од СУГС „Михајло Пупин”, Исра Сејфулла од СУГС „Цветан Димов”, Александар Филиповски од СУГС „Георги Димитров”, Лео Кeсeровиќ од СУГС „Георги Димитров”, Јовица Кекеновски од СУГС „Боро Петрушевски”, Марко Крстевски од СУГС „Боро Петрушевски”, Душко Димитровски од СУГС „Арсени Јовков“, Александар Јовановски од СУГС „Панче Караѓозов“, Ајла Муратовиќ од СУГС „Панче Караѓозов“, Васко Ѓорѓиевски од СУГС „Панче Караѓозов“, Даријан Шеќеров од СУГС „Раде Јовчевски Корчагин“, Сара Незири од СУГС „Сарај“, Теодора Солздановска од СУГС „Кочо Рацин“, Лејла Потурак од СУГС „Лазар Танев“, Андреј Ѓорѓиевски од СУГС „Лазар Танев“, Тамара Кунцулова од СЕПУГС „Васил Антевски Дрен“, Кристијан Поповски од СУГС „Никола Карев“, Тони Сали од СУГС „Шаип Јусуф“ и Неџиба Азир од СУГС „Шаип Јусуф“.
Манифестацијата „Средба на првиот со најдобрите“ се одржа под покровителство на градоначалникот Шилегов, а во организација на Дирекцијата за култура и уметност на Скопје и со поддршка на Делегацијата на Европската унија во нашата земја. Средбата на првиот со најдобрите годинава се одржа по 14.пат.
На доделувањето на признанијата на матурантите – првенци присуствуваше и амбасадорот на ЕУ во нашата земја, Дејвид Гир и претседателката на Советот на Град Скопје, Љубица Јанчева.
