Министерството за здравство, во соработка со Клиниката за гастроентерохепатологија и НВО „Хепар Центар-Битола” почна заедничка кампања за бесплатен и анонимен скрининг за Хепатитис Б, Ц и ХИВ, како и еластографија за хронични црнодробни заболувања.
Од мобилната медицинска екипа информираат дека во Скопје за два и пол часа се направени 150 прегледи со фиброскен. Кај десет граѓани биле забележани знаци на цироза и тие веднаш се упатени да извршат дополнителни прегледи на Клиниката за гастроентерохепатологија.
Мобилната екипа, денеска попладне е лоцирана на градскиот плоштад во Куманово, каде од 17.30 до 19.30 часот граѓаните имаат можност да направат скрининг за Хепатит Б, Ц и ХИВ, како и еластографија за хронични заболувања на црниот дроб. Во вторник мобилната екипа ќе биде во Гостивар – од 9 до 11 часот, а попладне бесплатен скрининг ќе може да направат граѓаните од Тетово, во периодот од 17.30 до 19.30 часот.
Во среда, мобилната екипа ќе биде лоцирана во Штип и Струмица – на градскиот плоштад во Штип бесплатно тестирање ќе се врши од 9 до 11 часот, а попладне граѓаните од Струмица ќе имаат можност за превентивен преглед од 17.30 до 19.30 часот.
Во следниот период тестирањата ќе продолжат во Струга, Охрид, Битола и Кавадарци.
“Наш фокус е превенција и подигнување на свесноста за црнодробните болести, како што се црнодробен карцином, замастување на црниот дроб од алкохолна и неалкохолна природа, цироза и ретки болести на црн дроб”, истакна министерот за здравство, д-р Арбен Таравари во рамки на посетата на мобилната единица на плоштад „Македонија“.
Националната кампања, се реализира во десет градови во државата.
