Изјава на градоначалникот на Куманово, Максим Димитриевски, за настанот во Сопот.
“Во текот на вчерашниот ден добивме информација од медиумите дека имало таков настан во с. Сопот и веднаш беше издаден од моја страна налог за вонреден инспекциски надзор. На лице место излезе градежен инспектор, во присуство на други лица е утврдено дека целиот објект во кој што е организиран настанот е дивоградба.
Истиот е изграден на државно земјоделско земјиште, кое што во имотниот лист бр.117 од катастарска општина Сопот, се води на парцела 963. Целиот објект е дивоградба и Општина Куманово нема издадено никаква документација во врска со градба на овој објект. Од страна на надлежна инспекциска служба е направен записник. Записникот е насочен кон НН лице, бидејќи од присутните лица таму никој не се пријавил дека е инвеститор или пак сопственик на објектот. Истиот записник денеска е истакнат на огласна табла на Општината.
Во рок од 3 дена додека трае постапката паралелно ќе доставиме пријава и до полиција да се открие НН сторителот на ова кривично дело и веднаш по затварање на записникот и истекот на рокот ќе биде процесуирана кривична пријава против сторителот, во овој случај НН лице.
Но дополнително добив информации и од Секторот за урбанизам дека за оваа предметна парцела исто така е поднесено и барање во 2018 година за легализација од страна на физичко лице и сите тие документи ќе ги доставиме како предмет на идната истрага.
Како ќе следуваат постапките?
Согласно законот Општина Куманово поднесува до сите прекршители на Законот доколку има кривична одговорност, кривична пријава до надлежното Јавно обвинителство Куманово, или Основно јавно обвинителство. Оваа година имаме поднесено вкупно 14 кривични пријави, ова ќе биде 15-та и продолжуваме со носење на решение за извршување на објектот и потоа ќе следува процедура за уривање на објектот.
Што се однесува што побаравте коментар по однос на политичкиот дел поради кој што беа испратени на овој настан можам само да констатирам, или да потврдам уште многу пати до сега ДУИ како носител на власта, а всушност дел од раководството на СДСМ кои што се на највисоки државни позиции се однесува како привезок.
ДУИ манифестира самовластие од позиција на власт повеќе од 20 години и токму во предизборниот период се користи со вакви методи за собирање на евтини политички поени, каде што многу пати со вакво однесување го руши и директно уставниот поредок на државата. Молкот од надлежните институции е повеќе од срам, бидејќи интегритетот на државата мора да се заштити.
Ова е локација во непосредна близина на границата со соседна Србија, каде што секојдневно патролира граничната полиција и зошто тоа никој не го пријавил и самиот се прашувам, но како и да е ние од моментот на сознанието ќе ги преземеме сите дејствија.
Изјавата на актуелниот премиер Ковачевски дека вакви натписи и табли на голема Албанија се постари и од 145 години, всушност од мој аспект ги гледам дека овие идеи се реинкарнираат од страна на поединци кои што не и посакуваат добро на државата, а всушност декларативно се претставуваат како зелени, како европејци, или како европски блок и мислам дека првенствено самиот премиер не доволно и не добро е информиран, бидејќи истакна дека оваа градба-дивоградба се наоѓа на приватно земјиште, што апсолутно не е точно и мислам дека треба подобро да го информираат службите со кои што непосредно соработува.
Но ме изненадува и молкот на други надлежни институции, како што во овој случај е МВР, чии што обврски согласно законот и согласно Уставот, се да го штити уставниот поредок на државата и кога некој поттикнува меѓуверска, меѓуетничка, меѓунационална конфронтација да го санкционира истото, изјави градоначалникот Димитриевски.
