„Ќе има дебата со Христијан Мицкоски кога јавно ќе каже дека е против бојкот на референдумот“, порача премиерот Зоран Заев, прашан дали ја прифаќа понудата за ТВ дуел која му ја испрати Мицкоски, лидерот на ВМРО-ДПМНЕ.
Заев рече дека такво нешто е можно само доколку постои основа за дебата.
„Себеси се сметам за промотор на дебата. Иднината на Македонија заслужува секогаш да се разговара за тоа прашање, од тој аспект бојкотирањето не претставува никаков основ за дебата. Ќе има дебата кога Мицкоски јавно ќе каже дека е против бојкот“, рече Заев.
Претседателот на ВМРО-ДПМНЕ Христијан Мицкоски преку социјалните мрежи му одговори на премиерот Зоран Заев на денешната изјава, откако лидерот на опозицијата вчера го повика на дуел.
-“Ќе му кажам на крајот од дуелот на Заев што мислам за бојкотот, тој само треба да се охрабри, да не бега од вистината и да прифати дебата. А ако се плаши и си бара изговор тоа е типично за човек што знае да витка кичма и да се однесува недостоинствено кон сопствениот народ плашејќи се да се соочи со вистината, а вистината е национално понижување, колективен грабеж, лаги и безидејност. На дуелот нема да може да дојде медиумската армадила под контрола на власта, ќе ги нема ниту оние партиски ширачи на невистини кои секојдневно парадираат лажно креирајќи розева слика, ниту пак некој од надвор ќе може да го брани, тој ќе е оставен сам на себе. Веројатно затоа не го пуштаат да излезе на дуел, пишува Мицкоски на социјалните мрежи.”
