Со 81 глас „ЗА“, вечерва пратениците во Собранието ги изгласаа уставните измени, односно амандманите 33 до 36, кои се обврска за Македонија според Преспанскиот договор што беше потпишан на 17. јуни минатата година.
Новото име на државата станува Република Северна Македонија. За ова да се случи потребно е објавување на измените во Службен весник но и Грција да го ратификува Договорот од Преспа.
На гласањето не присуствуваше најголемата опозициска партија ВМРО-ДПМНЕ, која го напушти парламентарниот дом со изговор дека нема да учествуваат во договор кој што ја разнебитувал Македонија.
Претходно пратениците на Алијансата за Албанците и на Беса ги повлекоа своите амандмани.
Според Уставниот закон кој беше исто така усвоен, овие амандмани влегуваат во сила дури откако целосно ќе стапи на сила Преспанскиот договор, односно биде ратификуван во грчкиот парламент. Според членот 1 од овој закон, амандманите нема да стапат на сила и ќе бидат неважечки ако Грција не го ратификува договорот.
Откако ќе стапи на сила 33-от амандман, државјанството ќе биде македонско/граѓанин на Република Северна Македонија, „што не ја определува ниту ја предодредува етничката припадност на граѓаните“. Придавката ќе биде „на Република Северна Македонија“ или „на Северна Македонија“.
Со 35-от амандман, Републиката гарантира дека „го почитува суверенитетот, територијалниот интегритет и политичката независност на соседните држави: Република Албанија, Република Бугарија, Република Грција, Република Косово и Република Србија“.
