Министерот за внатрешни работи, Панче Тошковски, на денешната прес-конференција во Кочани изјави дека според првичните информации, пожаротво дискотеката „Пулс“ избувнал како последица на искри од пиротехнички средства кои биле користени како светлосен ефект на концертот. Искрите го зафатиле таванскиот дел од дискотеката, кој бил направен од леснозапалив материјал, што довело до брзо ширење на огнот.
„Со длабока тага и болка ја известувам јавноста дека во оваа трагедија животот го загубија 51 лице, а повеќе од 100 лица се хоспитализирани. Ова е незапаметена трагедија што ја потресе целата држава“, изјави Тошковски. „Нашите мисли и молитви се со семејствата на загинатите. Изразуваме најдлабоко сочувство и поддршка во овие тешки моменти“, додаде министерот.
Министерството за внатрешни работи со сите свои капацитети останува на терен, преземајќи ги сите неопходни мерки. Истрагата ќе биде спроведена темелно и целосно и најави дека сите одговорни лица ќе бидат идентификувани и изведени пред лицето на правдата.
– Дел од лицата кои се во рамки на соодветна постапка се приведени и дел од организаторите се тешко повредени. Во координацијата сме со Јавното обвинителство и наскоро ќе излеземе со повеќе информации. Ќе мораме да работиме чекор по чекор, додаде министерот за внатрешни работи, Панче Тошковски.
