Претседателот на СДСМ, Зоран Заев вечерва во Арачиново порача дека граѓаните на Македонија пишуваат историја и заедно сплотени избираат живот. Тој упати порака до Груевски и власта дека федерализација нема да има но дека конфискација ќе има.
„Ова големо присуствуво овде покажува дека заедно испишуваме историја. Нека пукнат Груевски и Ахмети, го распукавме режимот, прснат е на парчиња, затоа што сме единствени сплотени и заедно ќе им покажеме дека може да има заеднички живот во Република Македонија. Сиромаштијата хара насекаде и тука во Арачиново и мое Муртино во Струмица. Младите ни се иселуваат. Исто боли солзата и на мајката Македонка и на мајката Албанка. Ова единство ќе го донесе животот подеднакво за сите. Измислуваат федерализација и кантонизација- лажат, ќе има конфискација, се што ви украдоа се ќе ви вратат. Очите на целиот свет се вперени во Македонија. Ќе видат на 11 декември дека е можно заедно да сме здружени и сплотени и победничка Македонија да испрати порака за соживот и живот.“ рече меѓудругото претседателот Заев.
