Здружението на новинари на Македонија (ЗНМ) ја поздравува одлуката на Специјалното јавно обвинителство (СЈО) со која бара да го преземе од Основното јавно обвинителство за гонење на организиран криминал и корпуција предметот против новинарот Зоран Божиновски, поврзан со случајот „Шпион“.
Божиновски е во притвор од април, оваа година, откако беше уапсен во Нови Сад, Србија, а потоа екстрадиран во земјава.
„Веруваме дека Специјалното јавно обвинителство ќе води покредибилна и поефикасна постапка за случајот на новинарот Божиновски и ќе помогне вистината побрзо да излезе на виделина. Се надеваме дека СЈО по преземањето на предметот сериозно ќе ја разгледа можноста да побара укинување на мерката притвор за Божиновски,“ се вели во соопштението од ЗНМ.
Од Здружението велат дека Македонија, како членка на Советот на Европа, има обврска да ја примени Европската конвенција за човековите права и слободи.
„Сметаме дека македонските власти во случај на Божиновски не ги почитуваат одлуките на Европскиот суд за човекови права во Стразбург, кој од земјите потписнички на Конвенцијата бара мерката притвор или затвор против новинар да ја применат само кога тие се обвинети за тероризам или говор на омраза. За сите други дела Европскиот суд смета дека затворањето на новинари е непропорционална мерка, со која може да се загрози слободата на говорот и слободата на медиумите“, велат од ЗНМ.
Оттаму додаваат дека ЗНМ останува на ставот дека „апсењето на Божиновски е политички мотивирано затоа што власта ги злоупотребува законите и институциите неосновано да ја ограничи слободата на медиумите“ и дека „Божиновски е притворен со единствена цел да се спречи да објавува нови коруптивни скандали против власта“.
Специјалното јавно обвинителство вчера соопшти дека испратило барање до ОЈО за гонење на организиран криминал и корупција за преземање на случајот против новинарот и сопственик на порталот „Буревесник“, Зоран Божиновски.
На нашето прашање, дали ОЈО за гонење на организиран криминал и корупција ќе го прададе овој предмет на СЈО, од Јавното обвинителство, ни одговорија само дека го добиле барањето од Специјалното јавно обвинителство.
Инаку, СЈО веќе ја презеде надлежност врз случајот „Шпион“, со кој е поврзан предметот против Божиновски, кој се товари за кривичните дела злосторничко здружување, шпионажа и за уцена.
