НУ Драмски театар Скопје вечер (4 октомври), со претставата „Чудесна терапија“, ќе настапи на 16. Меѓународен театарски фестивал „Св. Јоаким Осоговски“ во Крива Паланка. Претставата почнува во 19:30 часот во Националната установа Центар за култура Крива Паланка, а Фестивалот е дел од манифестацијата „Крива Паланка – град на културата за 2024“.
Претставата „Чудесна терапија“ е на редовниот репертоар на Драмскиот театар Скопје од 2019 година и на Фестивалот ќе биде нејзината 40 изведба.
Фестивалот започна на 29 септември и ќе трае до 5 октомври 2024 година. Организатор е Општина Крива Паланка, а селекторите и оваа година подготвија атрактивна фестивалска програма со претстави од неколку национални театри, како и претстави од регионот.
Крива Паланка, градот на културата за 2024 година, во периодот на одржување на Фестивалот ќе биде домаќин на ансамблите од: Драмскиот театар Скопје, МНТ, НТ при НУ Центар за култура „Трајко Прокопиев“ – Куманово, НТ при НУ ЦК „Јордан Хаџи Константинов-Џинот“ – Велес, како и на театрите од соседните земји: ГТ „Јоза Ивакиќ“, Винковци, Хрватска; НТ „Серија“, Вршац и уметничка работилница „Призор“, Белград и Драган Маца Маринковиќ, Република Србија, и Општински театар Ќустендил, Република Бугарија.
