Веќе 12 часа сме присутни во Управата за безбедност и контраразузнавање и се уште тапкаме во место, немаме пристап до документите за кои добивме судска наредба, рече Специјалната јавна обвинителка Катица Јанева која денеска во 1 часот по полноќ даде изјава за медиумите од пред Министерството за внатрешни работи.
– Ние нема да си одиме се додека не постапиме по судските наредби. Јас ќе бидам цела вечер тука се додека можам да издржам – изјави Јанева.
Јанева изјави дека е разочарана од односот на раководството во УБК, како и од директорот на Бирото за јавна безбедност Митко Чавков, кој постојано бил до обвинителите и истражителите, под изговор дека се грижел за полицајците, а дополнителниот заменик министер Оливер Андонов воопшто не се ни поздравил со тимот од СЈО.
Таа додаде дека се организирани во повеќе групи за дежурства и од УБК ако треба ќе останат и до 1 јануари следната година, се додека не ги добијат бараните документи.
Обвинителката Ленче Ристовска објасни дека вчера добиле наредба од Основниот суд Скопје 1 за да ги добијат сите податоци за броевите кои биле маркирани во УБК и за кои се сомневаат дека се во моменталните системи во Управата.
– Наша цел е да видиме дали се таму. На наше жалење, раководните органи велат дека немаат ни технички, ни човечки ресурси за да може да пристапиме во системите за прислушување – рече Ристовска.
