Собранието доцни со изборот на член на Уставниот суд кому му престанува мандадот, изјави Бујар Османи, вицепремиерот за европски прашања на 30 август, презентирајќи ги резултатите од имплементацијата на првиот дел од реформскиот план „3-6-9“.
Станува збор за избор на член на Уставниот суд на местото на досегашниот судија Исмаил Дарлишта, кому деветгодишниот мандат му истече на 31 јули. Тој беше избран во 2008 година на предлог на Комисијата за избори и именувања, а оваа комисија треба да го предложи и неговиот наследник. Комисијата, и по месец и половина, сè уште не излегла со предлог за судија, кого треба да го изгласа Собранието.
Мнозинство во Комисијата има опозицијата, односно шест членови се од ВМРО-ДПМНЕ, на чело со Илија Димовски како претседател, СДСМ има пет, ДУИ еден и Беса еден член.
Дарлишта, како што може да се види на интернет-страницата на Уставниот суд, веќе е избришан од списокот на судии, односно судот работи со еден судија помалку, иако сè уште ја нема закажано првата седница по завршувањето на судиската ферија.
На 7 октомври им завршува мандатот и на судијките Наташа Габер-Дамјановска и Гзиме Старова, а пополнувањето на нивните места ќе биде уште покомплицирано од изборот на наследник на Дарлишта.
Наследниците на Габер-Дамјановска и на Старова ги избира Собранието, но на предлог на претседателот на државата Ѓорге Иванов. Според член 84 од Уставот, претседателот предлага двајца членови на Уставниот суд. Габер-Дамјановска и Старова беа избрани на 7 октомври 2008 година, на предлог на тогашниот претседател на државата, Бранко Црвенковски, по неколку месеци одложување бидејќи опозицијата ја бојкотираше работата на Собранието.
Ваквата ситуација ќе биде вистински тест за кохабитацијата меѓу претседателот и актуелното парламентарно мнозинство, предводено од СДСМ.
Упатените за „Мета“ велат дека Иванов, сакал – не сакал, ќе мора да се договори со мнозинството околу кандидатите, бидејќи во спротивно Собранието нема да му ги гласа неговите предлози, што може да го одолговлече комплетирањето на составот на Уставниот суд.
Инаку, минималниот број на судии со кои може да функционира Уставниот суд е шест судии, но во таков случај проблем е обезбедувањето мнозинство за донесување одлуки.
Членовите на Уставниот суд, Собранието ги избира на пленарна седница со 61 глас, а доколку е предложен кандидат Албанец, тогаш се гласа и со Бандентерово мнозинство.
