„Меиловите со најави за поставени бомби се праќаат од надвор и за истрагата одиме преку меѓународна правна помош. Во истрагата и во обезбедувањето на информации и докази се вклучени сите капацитети на повеќе сектори на министерството за внатрешни работи, како и партнерските служби и иако досега сите дојави се лажни, по секоја мора да се постапува по строго дефинирани протоколи кои не може да се изземат“, изјави министерот за внатрешни работи Оливер Спасовски во „24 анализа“ на ТВ24.
„Она што е карактеристично е што заканите се појавуваат во среда, четврток и петок и само во одредена смена на ученици и наставници и тоа се дел од аспектите кои се анализираат. Содржините на мејловите се различни. Денес имаше таква содржина дека некој наводно сакал да преговара. Но, со терористи нема преговори“, потенцираше Спасовски.
Министерот Спасовски рече дека сите информации и заклучоци МВР ќе ги соопшти кога ќе заврши истрагата и ќе има реализација, што ќе биде за многу брзо.
„Штом ќе ги утврдиме сите факти и податоци, во соработка со јавното обвинителство ќе излеземе во јавност и се ќе биде транспарентно објавено“, истакна министерот.
Спасовски истакна дека овие хибридни напади не се изолиран случај само во Северна Македонија, дека вакви напади има во САД, Србија, Хрватска, други земји членки на НАТО и ЕУ. Тој повика да не се политизира овој случај со цел ефикасно делување на институциите.
„Важно е да се сочува мирниот пристап на сите и покрај вознемиреноста и несигурноста и да не се политизира овој случај“, рече Спасовски.
![](https://denesmagazin.mk/wp-content/uploads/2019/12/SEMM-baner_MK.jpg)