Министерството за труд и социјална политика информира дека од утре почнува етапната исплата на јануарските пензии со цел да се овозможи поголема заштита на пензионерите во услови на опасност од коронавирусот.
Подигнувањето на пензиите преку филијалите и експозитурите на банките за пензионерите кои не користат картички ќе се реализира во четири групи, според висината на пензијата:
– Во вторник, на 26.01.2021 година исплата на пензии со висина до 11.000 денари;
– Во среда на 27.01.2021 година исплата на пензии во висина од 11.001 денари до 14.000 денари;
– Во четврток на 28.01.2021 година исплата на пензии во висина од 14.001 денари до 18.000 денари;
– Во петок, на 29.01. 2021 година исплата на пензии во висина над 18.000 денари.
Од Министерството информираат и дека пензионерите кои користат платежна картичка, поврзана со сметката на која се префрлува пензијата, со парите можат да располагаат од вторник 26 јануари.
Етапното процесирање на пензиите ќе овозможи спроведување на препораките и мерките за спречување и ширење на вирусот, со оглед на тоа што пензионерите како возрасна група се најранливи.
Министерството за труд и социјална политика укажува дека пензиите се сигурни на сметките на корисниците, пензискиот систем е стабилен и функционира без проблеми.
Пензионерите да се придржуваат до распоредот за исплати, затоа што етапната исплата е направена со цел да се намали метежот пред банките и можностите за загрозување на личното и јавното здравје.
