НА ДЕНЕШЕН ДЕН, 4 МАЈ
Во село Баница, Серско, Егејски дел на Македонија е убиен Георги (Гоце) Николов ДЕЛЧЕВ
Роден бил во Кукуш, Егејски дел на Македонија, на 23 јануари/4 февруари 1872 година. Тој бил припадник на македонското револуционерно движење, раководител на Македонската револуционерната организација (МРО), идеолог, организатор и водач на македонското револуционерно националноослободително движење во крајот на 19. и почетокот на 20. век, раководител на оружените сили, неприкосновен авторитет на македонската ослободителна борба и бескомпромисен борец за создавање на македонска држава. По професија бил учител. Се школувал во Кукуш, каде што завршил прогимназиско образование (1879-1887), во Солун, во Егзархиската гимназија „Св. Кирил и Методиј“ (1888-1891) каде што раководел таен ученички револуционерен кружок, и во Софија во Военото училиште (1891-1894). Се вратил во Македонија (1894) и во Штип бил учител во Ново Село. Тука се сретнал со Даме Груев и се вклучил во раководењето на Тајната македонска револуционерна организација. Тој ја проширил мрежата на Организацијата (пролетта во 1895 г.) и преку Виница организирал тајни канали. Во Солун учествувал на советувањето со водечките личности на МРО: Даме Груев, Пере Тошев и Иван Хаџи Николов, за заземање став кон Македонскиот комитет основан во Софија, подоцна преименуван во Врховен македонски комитет. Во септември бил назначен за директор на училиштето во Штип. Пред крајот на декември 1895 г. Делчев ополномоштен од ЦК на МРО, отпатувал во Софија за да работи на спречувањето на мешањето од Бугарија во внатрешните работи на македонското ослободително дело. Организирал пунктови на МРО во Ќустендил и во Дупница (во почетокот на 1896), а во февруари во Штип, организирал протестна демонстрација против власта. Учествувал на Солунскиот конрес (5-12 април 1896) на кој била усвоена нова идеологија и стратегија во дејствувањето, со вклучување и на Одринско, а со тоа и промена на името од МРО во Тајна македонско-одринска револуционерна организација (ТМОРО). Со Ѓорче Петров ги изработиле Уставот и Правилникот на Организацијата (1896), публикувани и дистрибуирани во 1897 г., каде што целта на дејствувањето на Организацијата била да извојува политичка автономија за Македонија и за Одринско со револуција. Делчев во Штип бил уапсен во април 1896 г. во врска со аферата со запленувањето на бомбите во Битола, а во мај 1896 г. повторно бил уапсен и спроведен во Скопје каде што бил затворен во Куршумли-ан. Во септември 1896 г. бил назначен за главен учител (директор) во Банско од каде што ја продолжил дејноста за ширење на мрежата на Револуционерната организација. Се откажал од учителската должност во ноември 1896 г. и целосно се посветил на македонското ослободително дело. Ја презел должноста на задграничен претставник на МРО во Софија од 16 декември 1896 г. Со писмо до католичкиот надбискуп во Пловдив, Менини војули 1898 г. на Ватикан и` ја претставил целта на македонската борба: да се исправи неправедното решение на Берлинскиот договор за Македонија и за добивање полна политичка автономија. Должноста задграничен претставник ја извршувал до 6 октомври 1901 г. и бил подвижен член на ЦК и главен ревизор на четите на Организацијата. Во тоа својство бил посветен на функционирањето на тајните канали, курирската служба, тајната пошта, обезбедувањето материјални средства и снабдувањето на Организацијата со оружје, со муниција, со револуционерна литература и со весници. Организирал производство на бомби и експлозиви во с. Саблер во Осоговската Планина, а потоа и на Св. Гора меѓу Зографскиот манастир и Хиландар. Вршел вооружување и тогаш во Македонија се појавиле првите вооружени чети на Организацијата. Заедно со Ѓорче Петров изработиле Правилник за четите. Со формирањето на селската милиција била доградена воената организација на МРО, која непосредно ја раководел Делчев, со статус на главен ревизор. Револуционерната организација ја презела на дело судската и извршната власт. На Солунскиот процес за новоселската афера во почетокот на 1901 г. во отсуство бил осуден на смрт. По добиеното известување за апсењето на членовите на ЦК во Солун, со Ѓорче Петров во средината на март издале инструктивно писмо до окружните, до околиските и до селските комитети, како и до војводите на четите, за продолжување на дејствувањето според постојната програма. За зацврстување на редовите во Организацијата презел инспекциска инструктивна обиколка во централниот и во западниот дел од Македонија од август 1901 до март 1902 г. На крајот од септември 1902 г. жестоко ја осудил врховистичката оружена акција во Горна Џумаја, објавена како востание. Додека дејствувал за самостојност и независност на Македонската револуционерна организација, надворешните и инфилтрираните внатрешни орудија со Иван Гарванов, по иструкции од Владата и од Кнезот на Бугарија, подготвиле кревање предвремено востание во Македонија. Делчев го отфрлил решението на Солунскиот конгрес (15-17 јануари 1903) за кревање востание и на 25 јануари 1903 г. со чета заминал во внатрешноста на Македонија со раководните кадри да издејствува повлекување на решението. Во април 1903 г., во Солун се сретнал со Даме Груев, кој штотуку се вратил од заточение, го прифатил решението и останал неотстапчив. Од Солун се упатил за Серско на закажаниот конгрес на Серскиот револуционерен округ на 6 мај 1903 г. Пристигнал во селото Баница, Серско, Егејски дел на Македонија на 3 мај 1903 г. каде турската војска ја опколила неговата четата и по долготрајуна борба утрото на 21 април/4 мај 1903 г. тој бил убиен.
Александар ЛИТОВСКИ
