Од Министерството за внатрешни работи информираат дека се уште се истражува причината за сообраќајната несреќа што синоќа се случи на автопатот Велес – Скопје, во која една жена загина, а 27 патници беа повредени.
Исто така се чека извештајот од вонредниот технички преглед на автобусот, а од возачот на автобусот е земен примерок на крв за анализа и започна прибирање на трагите пронајдени на лице место.
Во сообраќајната несреќа загина 68-годишна жена, а на едно деветгодишно дете му е ампутирана раката. Потешко се повредени четири лица кои се сметени на КАРИЛ во Клиничкиот центар „Мајка Тереза“ во Скопје.
Сообраќајната несреќа се случи синоќа околу 19 часот кога автобус со македонски регистарски ознаки кој превезувал патници кои се враќале од летување во Грција, изгубил контрола и излетал од коловозот на автопатот Велес – Скопје.
