Приоритет на министерката Стефковска е заштитата на културното наследство (ВИДЕО)

Сподели

Министерка за култура Ирена Стефоска на вчерашната прес-конференција изјави дека заштитата на културното наследство е врвен приоритет на нејзиниот кабинет и дека макотрпно ќе работи на раскрстување со вандалскиот однос кон нашето наследство „бидејќи таквиот однос кон него, сите нѐ носи во пропаст“.

Како приоритети на министерството се прогласување културно добро во опасност на црквата „Св. Ѓорѓи“ во Курбиново и на манастирот „Успение на Пресвета Богородица“ во Матејче, како и анализа за состојбата на спомениците на Народно-ослободителната борба (НОБ). Од надлежните институции министерката побарала детални податоци и анализи за црквата „Св. Ѓорѓи“ во Курбиново, каде што по 7 години изготвување проекти, досега се спроведени само заштитна покривна конструкција и превентива на ѕидното сликарство. Исто така од Секторот во Министерството побарала да изготват листа на споменици од НОБ, на територијата на целата земја, кои лично ќе ги обиколи за да види во каква состојба се наоѓаат.

**Фотографија на една од фреските во црквата „Свети Ѓорѓи“ во Курбиново од изложбата на Панче Велков**

Во програмата нотирана е и ревитализација на централното градско подрачје по штетите предизвикани од проектот „Скопје 2014“, која ќе биде реализирана заедно со Град Скопје, а според програмата на Владата за оваа цел се планирано распишување меѓународен конкурс.

Министерката Стефковска изјави дека се наближува и терминот за распишување на Годишните конкурси за проекти од национален интерес во културата, па така во Министерството интензивно се работи на „усовршување на критериумите за апликација и за вреднување на проектите и програмите“ и дека во оваа смисла од исклучителна важност е Собранието што побрзо да го донесе новиот Закон за јавен интерес во културата, во кој, меѓу останатото се менува и моделот на финансирање во културата.