Сега е моментот да се прекине политичката криза и да се договори датум за избори и сега сите заедно треба да работиме на тоа, рече лидерот на ДПА, Мендух Тачи, по средбата со помошник државниот секретар на САД за европски и за евроазиски прашања, Викторија Нуланд.
– Зборувавме за тоа дека е крајно време Македонија да ја надмине кризата, но и за стратешките определби на државата – рече Тачи по средбата со Нуланд.
На новинарско прашање дали по посетата на Нуланд може да се очекува лидерска средба, Тачи рече дека „не е баба Ванѓа“, но дека логично е да се очекува такво нешто.
Нуланд прво се сретна со лидерот на ДУИ, Али Ахмети, кој не даде изјава.
По средбата со Тачи, Нуланд замина во седиштето на СДСМ на средба со Зоран Заев, а потоа таа треба да се сретне и со лидерот на ВМРО-ДПМНЕ, Никола Груевски, во седиштето на владејачката партија.
