Премиерот и министрите на вчерашната 43. седница, ги усвоија измени на Законот за полиција со кои ќе се ограничи употребата на гумени куршуми.
„Најавуваме измени и дополнување на Законот за полиција, со кој што ќе се ограничи употребата на средства за присила како што се гумените куршуми, хемиски средства и слично“, соопшти Миле Бошњаковски.
Како што соопштија од Владата, предлог-измените тргнуваат од недореченостите кои се однесуваат на дискреционото право на полициските службеници при примената на овие средства за присилба и од недостигот на одредби со кои се уредува рангот на полициски службеник кој ја одобрува употребата на наведените средства за присилба.
„Во анализите се укажува и на потребата од додефинирање на начинот, условите и ситуациите на употреба на електричниот парализатор и гумените куршуми. Исто така, со предлог-измените се препорачува доуредување на материјата за користење на средствата за присилба со јасно утврдени процедури и правила, траење и интензитет на користењето, ограничување кога може да се користат, како и мерки за претпазливост и заштита на здравјето“, стои во соопштението.
Предлог законот ќе биде усогласен согласно меѓународните стандарди.
Актуелниот Закон за полиција, кој беше изгласан во 2015 година, и овозможува на полицијата да користи гумени куршуми и електрични пиштоли за справување со агресивни демонстранти, со цел „привремено онеспособување и доведување во послушност на агресивни лица, кога со други средства лицето не може да се доведе во послушност“.
